Congress party ni lo PM ni rei thei ber Narendra Modi

BJP party aṭanga thlan tlin India ram prime minister ni lai mek Narendra Modi chu Congress party mi ni lo zinga prime minister ni rei thei ber niin, India rama PM lo ni tawh zinga PM nihna chelh rei ber palina a ni mek.

Modi aia PM hna chelh rei palite chu Jawaharlal Nehru, Indira Gandhi leh Manmohan Singh-te an ni a, anni hi Indian National Congress party aṭanga PM ni vek an ni. BJP aṭanga PM nihna lo chelh tawh, Atal Bihari Vajpayee an PM dinhmun a chelh chen, ni  2,268-na chu Modi hian August 13 khan a leh pel a, Modi chu Congress party mi ni lo zinga PM ni rei thei ber a ni ta a ni. Vajpayee hian term thum chhung PM hna hi a chelh thei a, PM hna a chelh hmasak ber chu 1996 kha a ni a, ni 13 chhung chiah office a luah thung. 

Kum 1998 khan PM a ni leh a, thla 13 (March 1998-April 1999) chhung a nih hnuah kum 1999 aṭanga 2004 May 22 thleng khan PM hna hi a chelh leh a ni. Vajpayee-a'n PM hna a chelh chhung hi ni 2,268 a ni. Hei hi Modi chuan a rawn khum. Jawaharlal Nehru khan August 15, 1947-May 27, 1964 chhung PM hna chelh a, PM anih hun chhung hi ni 6,130 a ni. A fanu Indira Gandhi kha January 24, 1966-March 24, 1977 thleng PM a ni ve leh a, a hnuah PM hna chelh lehin, January 14, 1980 aṭangin thah a nih thleng October 31, 1984 khan PM a ni bawk. Indira Gandhi hi ni 5,829 chhung PM a ni. Manmohan Singh kha May 22, 2004-May 26, 2014 thleng PM a rawn ni ve leh a,  PM a nih hun chhung hi ni 3,656 a ni. India ram prime minister ni lai mek Narendra Modi hi kum 2014 May 26 aṭanga vawiin thlengin PM a la ni.