EAM-in tihhlum tura an chungthu rel chhungte a hmu

External affairs minister S. Jaishankar chuan Qatar Court of First Instance-in India mi tihhlum tura an chungthu a rel sak chhungte hmuin, sorkarin hna pawimawh bera a neih thu leh dam taka India-a hruai haw leh a tum tur thu a hrilh.

India-in Qatar court rorel dan hi mak a tih thu leh a ṭhawn thu Jaishankar chuan a sawi a, tihhlum an nih hmaa a theih ang anga dan hmanga beih let an tum thu a sawi. "Sorkarin a theihtawpin chhuah zalen an nih theihna atan hma a la ang a, an chhungte pawh hma kan lak dan chungchangah kan be pawp reng ang. An lungngaihna hi ka hriatthiampuiin ka ṭawmpui a ni," tiin Jaishankar chuan X-ah post-in a tarlang.

Qatar court-in tihhlum tura an chungthu a relte hi Indian Navy ṭang ṭhinte niin, Qatar-a private company pakhat, Al Dahra tan an thawk a, nikum August khan enthlatua puh an nih avangin man an ni. Man an nih hnu hian kumin March 25 khan Qatar court-ah an chungthu hi ngaihtuah a ni a, October 26 khan thiam loh chantirin, thi tura hremna hi pek an ni.