Andhra Pradesh rel chet sualnaah mi 11 thi

Andhra Pradesh-a Vizianagaram district-ah Pathianni zan khan Howrah-Chennai rel kawngah rel pahnihin insuin hriat theih chinah chet sualna thlengah hian mi 14 an thi a, mi 60-in hliam an tuar niin Railway DRM, Saurabh Prasad chuan a sawi.

Rel insute hi passenger rel - 08532 Visakhapatnam-Palsa leh passenger rel vek - 08504 Visakhapatnam-Rayagada te an ni a, DRM Saurabh Prasad chuan chet sualna thlen dan chhui chian nghal a nih tur thu a puang. Ṭanpuina leh chhanchhuah hna thawk tur hian National Disaster Response Force (NDRF) team khat leh State Disaster Response Force (SDRF) team hnihte chuan a hmun an thleng nghal a ni. Vizianagaram collector S. Nagalakshmi chuan chet sualna chungchang an hriat hnu hian Kothavalasa Area damdawi in leh Visakhapatnam-a King George damdawi inah te hliam tuar phur tur hian ambulance tirh nghal a nih thu a sawi bawk. Heng bakah hian chhanchhuahna hna thawk turin Odisha Fire and emergency service mi leh sa te tirh chhuah an nih thu DIGP, FS, Dr. Sarthak Sarangi chuan a sawi bawk a, Viziangaram district medical and health department chuan chet sualna hmuna hliam enkawl leh buaipui tur an intirh thu an puang bawk. Revenue, Roads and Buildings leh Transport department-te chu Railway department-te nen ṭangkawpa ṭanpuina hna thawk tura hriattir an ni bawk.

Railway minister, Ashwini Vaishnaw chuan chhiat tawkte ṭanpuina tur sum pek a nih tur thu a puang nghal a,"Hliam tuar zawng zawngte damdawi inah dah an ni. Nunna chante hnenah cheng nuai 10 pek an ni ang a, hliam tuar enkawl ngaite tan Rs. nuai 2 leh hliam tenau tuarte chu Rs. 50,000-a ṭanpui an ni ang," tiin a puang.

Mi tam takin an chhungte leh ṭhiante chanchin ngaihven tura chet sualna hmun an pan avangin Railway chuan hliam tuar leh thite hriat an nih theihna tur helpline a siam a, phone number an dah chhuah hmangin ngaihven mai theih a nih tur thu an sawi. Rel chet sualna avang hian helai rel kawng hi khar rih a ni a, rel tlan tur tam tak cancel a ni bawk.