Sri Lanka-in India mi sangha mantu 37 man

Tamil Nadu-a sangha mana eizawng mi 37-te chu an lawng panga nen Sri Lanka navy te chuan Sri Lanka tuipui china sangha manah puhin an man tih Chennai-a thuneitute chuan an sawi. Sir Lanka Navy-te hian October thla chhung hian India mi sangha mantu 64 leh lawng 10 an man tling tawh.

Tamil Nadu chief minister, MK Stalin chuan union external affairs minister S. Jaishankar biain, Sri Lanka Navy-te'n an man sangha mantu leh an lawngte chhuah a nih theih nana hma la turin a ngen. CM Stalin chuan sangha mantute hian an sangha man hi eizawnna leh innghahna atan an hmang a, hetianga man an tawk fo hian an rilruah hlauhna a tuhsak a ni, a ti. India sorkar chuan sangha mantute dikna leh himna atan tun ai hian hmalakna neih leh ngaihsakna lantir tura a duh thu a sawi. Sri Lanka navy-te chu an state-a sangha mantute tan harsatna leh hlauhna siamsakah a puh.

Stalin hian hmasang aṭanga India sangha mantute chu Palk Bay chhehvela an lo chet tlat thu leh, an sangha man reng reng ṭhinna chu humhim a duh thu uar takin a sawi. Vawi tam tak sangha mantute man lo tur leh an lawng lo mansak pawh titawp tura an ngen hnuah pawh, Sri Lanka navy-te hian an la chhunzawm reng tho a, hemi chungchangah hian ram pahnihte hian inbiakna mumal tak neiin harsatna hi chingfel vat se a duh thu a sawi a ni.