ED-in thu zawh fiah turin Arvind Kejriwal ko

Enforcement Directorate (ED) chuan Delhi chief minister Arvind Kejriwal chu Delhi excise policy thubuai kaihhnawihah thu zawh fiah turin an ko. Delhi excise policy thubuai hi Central Bureau of Investigation (CBI)-te'n 2021-2022 chhunga Delhi-a zu zawrh dan leh zawrh chhuah a nih chungchanga FIR an theh luh aṭanga irh chhuak niin, ED-te hian an kut ken a ni.

ED hian AAP hmalaknaa Delhi-a zu zawrh a nih dan phungah induhsakna uchuak tak leh inthamna a thleng ngei tih sawiin, zu zawrhna tur license fee tihhniamsak te, pawmpuina tel loa L-1 license lo pek te a awm thu an sawi. Hei bakah hian AAP communication and media in-charge, Vijay Nair chu party hruaitute aiawha South Group an tihte hnen aṭanga Rs. vbc 100 dawngah puh bawkin, zu zuar zingah wholesale-a pe chhuaktute chuan 12% hlep nei khawpa an zuar thei leh, retail-a zuarte pawhin 185% dawna hlawkna an tel thei chu thil rinhlelhawm tak nia an hriat thu ED chuan an sawi.

April 16 khan CBI chuan Kejriwal hi thu an lo zawt fiah tawh a, mahse, Kejriwal chuan thubuai kal mek chu siam chawp leh politics hmanga inbeihna mai a nih thu leh, AAP tihchhiatna atana BJP hmalakna a nih thu a sawi.

Kejriwal bakah hian AAP hruaitu hlun pahnih, Manish Sisodia leh Sanjay Singh te chu he thubuai kaihhnawihah vek hian an chungthu ngaihtuah turin an tang mek bawk. Sisodia hi nikum February 26 khan man niin, Sanjay Singh hi nikum October 5 khan man a ni ve thung a ni. AAP senior party leader, Atishi chuan Delhi leh Punjab-a AAP hnathawh ṭha tak avangin BJP chu a hlauthawng nia puhin, thil dik tawk lo hmanga AAP hruaitute jail-a dah vek chu an tum ber a nih thu a sawi."Heng thubuai an siam chawp hmang hian Kejriwal pawh November 2-ah thu zawh fiah turin ED-in an ko leh a ni. Dik lo taka mana jail-a dah an tum mek. BJP hian hei hi lo hria se ka duh, jail-a tan leh dah kan hlau lo a, mipui tana hna ṭha kan thawh hi kan chhunzawm zel tho ang," a ti.