West Bengal : MGNREGA hnuaia thawkte'n Khela Hobe hnuaiah hna an zawng

West Bengal-ah Mahatma Gandhi National Rural Employment Guarantee Act (MGNREGA) tihtawp lailawk a nih avangin, state-a rorel lai Trinamool Congress (TMC) hruaitu leh chief minister Mamata Banergee-i'n MGNREGA hnuaia thawkte tana hna pekna tur 'Khela Hobe' kalpui a nih tur thu a sawi chu tlangzarh a nih hma hauhin mi eng emaw zatin an dilna an theh lut tawh.

Paschim Banga Khet Majoor Samity (PBKMS)-in thuchhuah an siamah,"Purulia district bikah, October thla tir kar hnih chhung khan mi 741-in Khela Hobe hnuaia hna dilna an theh lut tawh. A diltute hnenah hian eng hna mah pek an la ni lo a, Khela Hobe aṭanga hmalak dan tur pawh hi engmah sawi chian a la awm lo," tiin an tarlang.

Sorkar laipui hian National Rural Employment Guarantee Scheme hnuaia section 27 hmangin West Bengal-a MGNREGA sum pek chu December 2021 aṭang khan a titawp a, hei hi eirukna kaihhnawih thil a awm vang niin a sawi. PBKMS chuan thla 22 dawn a liam tawh hnu pawha sorkar laipuiin an la chhui zo lo chu mak an tih thu leh, district hnufual em em, Purulia anga loneitu leh kut hnathawktute tan phei chuan an harsatna a zual phah tur thu an sawi a ni. PBKMS hian TMC-in MGNREGA sum pe chhuak tura sorkar laipui nawra hun tiam a pek chu a ral ṭep tawh bawk avangin thuchhuah hi an siam ta niin an sawi.

TMC general secretary, Abhishek Banerjee chuan sorkar laipuiin West Bengal-a MGNREGA hnuaia hnathawkte tana hlawh a pek tur sum chu pek an nih vat loh chuan nawrh huaihawt leh a tum thu a sawi. Abhishek hian October 2 leh 3 khan Delhi leh, October 9-14 khan Raj Bhavan kawtah nawrh a lo huaihawt tawh a ni.

Kum 2021 election campaign-ah khan TMC hian Khela Hobe hi an tlangaupui tawh a, kumin July 31-a Martyr day hmanna kawngzawhah khan Mamata hian MGNREGA tawp avanga hna nei lote tana hna pekna tur a nih thu sawi lehin agriculture workers union mi eng emaw zatte chuan hman a nih thuai theih nan Khela Hobe hming hian hna an dil a ni.