Maratha Quota phuta nawrhna avangin Maharashtra district ṭhenkhatah pun khawm khap
Maharashtra-a Maratha quota phut avanga nawrhnaah buaina chhuak avangin nimin khan Beed district-ah chuan pun khawm khap a ni a, buaina chhuakah hian Nationalist Congress Party building ṭhenkhat leh MLA ṭhenkhatte in chu suasam a ni.
Nawrh huaihawta pung khawmte hian Sharad Pawar kaihhruai NCP aṭanga phel, Ajit Pawar-a kaihhruai NCP MLA, Prakash Solanke in, Beed district-a awm chu lunga vawmin an hal zui a, Beed-ah vek hian Sharad Pawar-a kaihhruai NCP office leh Municipal house building te pawh an hal a ni. Solapur leh Pandhanpur-ah te chuan sorkar bus hal a ni bawk.
Buaina chhuak kaihhnawihah hian mi 49 man an ni tawh tih Nandkumar Thakur, Superintendent of Police chuan a sawi. Beed ang bawk hian Dharashiv-ah pawh pun khawm khap chhunzawm ve nghal a ni. NCP hruaitu, Chhagan Bhjbal leh Union Minister, Narayan Rane te chu venhimna khauh zawk pek an ni bawk.
Maratha te hian zirna in leh sorkar hnaah an puala reservation siam phut hian an lo nawr fo tawh a, tuna nawrh huaihawt a nih leh chhan hi Maratha quota phuta chaw ngheia nuar mek, Manoj Jarange Patil chungchang mawi lo taka sawi a nih vang a ni. Beed-a a in an halsak, Solanke pawh hian Manoj Patil chungchangah hian quota phut chu naupang infiamna ang leka sawiin, gram panchayat inthlan pawh la chuh lo chu mi finga an chhuah tak thu a sawi.
Chief minister Eknath Shinde chuan Governor Ramesh Bais hmuin an state-a dan leh thupek kenkawh dan tur leh, buaina chinfel dan tur a sawipui. Governor bakah hian deputy chief minister, Defendra Fadnavis pawh a kawm bawk. Shinde sorkar hian judge bang tawh Sandeep Shinde kaihhruai committee report zulzuiin, Maratha hnamte tana Kunbi caste certificate pek chu an pawm rin a ni a, document tam tak en dik a nih hnuah Maratha 11,530 te chu Kunbi an ni ngei tih fiah a ni, an ti. Maharashtra sorkar hian Maratha hnamte tana reservation siam chu an tum thu leh, dan anga tihfel hmasak tur a tam avanga la ti thei rih lo mai an nih thu an lo sawi tawh a ni.