EC-in November 30 thleng exit poll neih phal lo

Election Commission (EC) chuan November thla chhunga state pangaa assembly inthlan lo awm tur atana notification a chhuahah exit poll neih, tihchhuah leh theh darh te khap a nih thu a tarlang. EC hian exit poll neih phal loh hun chhung hi November 7 zing dar 7:00 aṭanga November 30 zan dar 6:30 a nih thu an tarlang.

Inthlan atana dan awmte tarlangin, EC chuan he section hnuaia inkaihhruaina dante bawhchhia chu kum hnih thleng tang tura hrem emaw pawisa chawitir theih emaw an ni a, a pahniha hrem theih an ni bawk a ni, a ti. Khapna a siam hun chhunga exit poll lo buatsaih, lo tihchhuah leh theh darh chu ziakin emaw, electronic media hmangin emaw, eng hmang maha phal a ni lo tiin, he khapna hian state panga inthlan hmachhawn turte bakah Nagaland-a assembly by-election neih tur a huam dawn a ni.

November thla hian state panga; Chhattisgarh, Mizoram, Madhya Pradesh, Rajasthan leh Telangana te chuan assembly inthlan an nei dawn a, Mizoram leh Chhattisgarh 1st phase te hi November 7-ah neih tur niin, Madhya Pradesh leh Chhattisgarh 2nd phase hi November 17, Rajasthan-ah November 25 leh Telangana-ah November 30 hian inthlan hi neih tur a ni. Inthlan result hi a vaiin December 3-a chhiar tur a ni ang.