President-in Ladakh UT foundation day hmanpui

President Droupadi Murmu chuan October 31 khan Ladakh Union Territory-in kum li (4) a tlinna, 'Ladakh Union Territory 4th Foundation Day' a hmanpui.

Ni hnih cham turin President hian October 31 khan Ladakh khawpui, Leh a thleng a, Ladakh Lt. Governor, Brigadier (rtd.) BD. Mishra chuan President hi Leh airport-ah lo hmuakin, Sindhu Sanskriti Kendra-ah Ladakh foundation hmannaah a telpui. Nimin khan Siachen Base camp a tlawh bawk a, sipaite nen inkawmna hun an hman bakah, Leh-a mipuite'n amah chawimawina hun an siamah a tel chhunzawm leh bawk. President hian Leh-a self-help group member leh helaia tribal mi awmte a kawm bawk a ni.

Sorkar laipuiin August 5, 2019-a Jammu & Kashmir (J&K) special status hlipa, J&K Reorganisatoin Act hmanga J&K UT leh Ladakh UT a pian hnuah October 31 khan Ladakh chuan kum li hmel a hmu ta a ni. J&K UT pawhin Lt. Governor Manoj Sinha hoin Bakshi stadium-ah J&K UT foundation day an hmang ve bawk. J&K-a foundation day hman hi eptu party- Congress, National Conference (NC) leh Communist Party of India-Marxist (CPI-M) te chuan hliama chi phul ang a nih thu leh, J&K-in UT a nihna a lawm a ngai chu state nihna aṭanga UT-a tlakhniamna lawmna tiin an sawisel thung.