Boris Johnson-a'n India sawmna a pawm Republic Day parade chief guest a ni dawn

United Kingdom prime minister Boris Johnson chuan India-in nakkum Republic Day lawmnaa chief guest tura a sawmna chu a pawm.

Boris Johnson hi UK Prime Minister zinga Republic Day chhim tur pahnihna a ni dawn a, kum 1993 khan John Major chu India Republic Day lawmnaah a tel tawh a ni. Johnson hian India sawmna a pawm rual hian nakkuma UK-a G7 summit neih turah India chu tel turin a sawm ve nghal bawk.

Downing Street chuan nimin khan hemi chungchangah hian thuchhuah siamin prime minister Boris Johnson chu nakkum January-ah India ramah a zin dawn tih an puang chiang a, ram pahnih inkara inkungkaihna ṭha zawk a awm theihna tur a nih thu tarlangin European Union aṭanga UK a chhuah hnua ram dang pangngai taka PM-in a tlawhna hmasa ber tur a ni, an ti bawk.

UK PM chuan prime minister Narendra Modi hnenah a sawmna a pawmna lehkha hi thawnin UK G7 Summit-a tel turin India chu a sawm nghal a, South Korea leh Australia-te nen guest nation anga tel tura sawmna a thawn tel a ni.

Boris Johnson hian India ram a rawn tlawh chhung hian a hun ṭangkai taka hman a tum thu hi tarlan niin, sumdawnna leh investment, defence leh venhimna, health leh climate change thlenga chak zawka thawhdunna tur chungchang India ram hruaitute sawipui a tum niin an tarlang.

Johnson chuan,"Nakkuma India ka tlawh tur hi ka lawm hle a, Global Britain tana kum phurawm tak bul ṭanna atana ka hmang tur hi ka hlim hle, prime minister Modi nena kan lo ruahman tawh ram pahnih inkara inkungkaihna ṭha zawk siam hlan ka nghakhlel tawh hle a ni," a ti.

Ram pahnihte chu investor leh market ṭha tak an in nih tawn thu sawiin, kum khat chhunga an insumdawn tawnna chu pound tluklehdingawn 24 vel a ni tih a sawi. UK-ah chuan Indian company 842 an awm thu leh, an sum che vel hi pound tld 41.2 vel niin, mi tam tak hna thawh tur an siamsak a ni, tiin Johnson chuan a sawi.