OMC-in commercial gas cylinder man tisang

Oil Marketing Company (OMC) chuan nimin aṭanga hman ṭan turin commercial LPG gas cylinder man a tisang a, domestic LPG man erawh tihdanglam a ni lo thung.

Commercial LPG cylinder, kg 19-hi bur khat Rs 101-a tihsan a ni a, rate tharah hian Delhi-ah commercial LPG cylinder hi Rs 1,833, Kolkata-ah Rs 1,943, Mumbai-ah Rs 1,785, Bengaluru-ah Rs 1,914.50 leh Chennai-ah Rs 1,999.50 te an ni dawn ta a ni. Tun ṭum hi thla hnih chhunga commercial LPG cylinder man tihsan a nih ṭum hnihna a ni. Gas cylinder man ennawn hi Ocotober 1 khan neih a ni tawh a, hetah hian OMC hian commerial LPG gas cylinder, kg 19 ho chu Rs. 209-in a lo tisang tawh bawk.

Commercial leh domestic LPG gas cylinder man ennawn hi thla tin ni khatnaah neih ṭhin a ni a, hei hi sorkar dan awm sa leh market chet dan mil a ni. OMC hian August khan commercial LPG gylinder man hi Rs. 99.75-in a tihniam a, September aṭang erawh chuan a la pung chho zel thung. Commercial LPG gas cylinder man tihsan hian sumdawnna hrang hrang; restaurant neite leh khawlai dawr nghak leh dawr te nei te a nghawng a, thil man sang zel avanga an eizawnna kawnga harsatna a thlen theih dawn avangin tam tak chuan sorkar chu inrawlh a, ṭanpui turin an ngen.