ISA-a China tel nan an inhawng reng tih Union Minister-in sawi

Union minister for power and renewable energy leh International Solar Alliance (ISA) co-president ni bawk, R.K Singh chuan ISA assembly session hawnnaah International Solar Alliance member nihna chu United Nations-a member ram zawng zawngte tan hawn a nih thu leh, China chuan a zawm duh a nih chuan ISA chu an tan a inhawn reng thu a sawi.

RK. Singh chuan,"Eng siam chhuah theihna zawng zawng aṭanga 80% bakah, polysilicon wafers chung lam zawng zawngte hi China-a awm a ni tih hi hai rual a ni lo. A siam chhuahna lam hi sem rual a ṭulzia chu hripui len lai khan a chiang awm e. Hei vang hian ram tam takin mahni ram ngeiah eng siam theih tumin an inbun tawh a ni," a ti.

China hi khawvel huapa solar panel thawn chhuak hnem leh siam chhuak hnem ber ni mah se ISA-ah hian member a ni la ni lo a, Africa ram tam zawkah hian clean energy atana hnathawh reng rengah a siamtu leh a bul tumtu chu China a ni zel a ni. South Africa bikah chuan China aṭanga solar panel a lak luh hi 2023 chhung hian a hma kuma a lo lak tawh zawng zawng let li zet a tling tawh. Africa khawmual pum hian China aṭanga solar panel an lak luh hi a letin an tipung bawk a ni. China-in solar panel a thawn chhuah hi kum hmasa lam aiin 34% zetin a pung a, hei hi gigawatt 114 niin, United State-a solar install zawng zawng, gigawatt 113 aiin a tam a ni. India pawh hi China aṭanga solar panel la lut hnem a ni ṭhin a, mahse, tualchhung thil siam lama ṭan a lak hnuah kum 2023-ah hi chuan 2.3 gigawatt hu chauh a la lut tawh.

ISA secretariat hi Gurugram, Haryana-a awm a ni a, 2030-ah chuan billion dollar 1,000 senga ni zung chakna hmang energy siam thei bun hman an tum. United Nations Conference of Parties-in Paris Agreement an siam hnua India leh France-in an din a ni a, khawvel pum lumna celcius degree 2 aia sanga lum belhtir lo tura hma la duh ram leh, khawvel pum lum belhna celcius degree 1.5 aia hniam nihtir tumte an tel. Kum 2018 aṭang khan China hian a zawm ve dawn nia sawi a ni ṭhin a, mahse, India leh China inkar boruak ṭha lo ṭhin avangin China hian a la zawm ta lo a ni.