ED hmaah Kejriwal inlan dawn lo

Delhi sorkarin zu zawrhna license a pek chhuah leh hralh chhuah dan kaihhnawihah Enforcement Directorate (ED)-in thu zawh fiah tura Delhi chief minister Arvind Kejriwal an koh chungchangah, Aam Admi Party (AAP) chuan Kejriwal hi a inlan loh tur thu leh, Madhya Pradesh assembly inthlan tur campaign-naa a kal thu an sawi.

Kejriwal hian ED-in thu zawh fiah tura an ko chu dan kalh leh politics-a inbeihna hmanrua mai a nih thu sawiin, ED hmaa inlan a tum loh thu hi a lo sawi tawh bawk. Nimin kha a inlan hun ni mah se, Madhya Pradesh inthlan tur campaign-na lamah Punjab chief minister, Bhagwant Mann nen an tel a ni. Kejriwal hian ED hnenah hian thu zawh fiah tura an kohna notice chu sut tura phutin lehkha a thawn a, notice an pek chu BJP tana ti mai niin a puh bawk.

"ED hmaa inlan tura koh ka nih hian keimah ka nihna ang tawp nge Delhi CM ka nihna ang zawka koh ka nih an sawi lo. AAP National Convener ka nihna anga koh ka ni zawk em tih pawh an sawi lo a, thubuai an chhui mek kaihhnawih pawh ni lo thilah min ko mai mai a ni," tiin a sawi.

ED-in Delhi-a zu zawrh leh licence pek chhuah chungchang an chhuinaa AAP hruaitu Manish Sisodia leh Sanjay Singh an man hnuah Delhi CM, Arvind Kejriwal hi thu zawh fiah turin an ko ve leh a, AAP worker-te'n ED hmalakna an duh lohna lantira kawng zawh an tum avangin Delhi-a ED office venhimna lam khauh zawka kalpui a ni. Anni bakah hian ED hian Arvind Kejriwal sorkara social welfare minister, Raaj Kumar Anand chu pawisa chheprelh chungchangah nimin khan a in an dapsak bawk a ni.