Kerala sorkarin SC-ah Governor hek

Kerala sorkar chuan assembly-a bill pass tawh pawmpuia hming ziah hnan duh loah governor Arif Mohammed Khan chu puhin, Supreme Court-ah an zualko. Sorkar chuan Governor chu bill a kawl tante pawmpui tura nawr turin Supreme Court hi an ngen a ni.

Chief minister, Pinarayi Vijayan chuan Governor-in bill pass tawh pariat a pawmpui duh loh chungchangah hian hma la turin SC hi an ngen thu a tarlang."Tihdan phung pangngaiah chuan Governor hian a hnena bill lut zawng zawngte pawmpuina pe tur hian hun rei tak a la tur a ni lo. Hei hi kan ram democracy kalphung leh mipuite mamawh pekna kawng bakah inrelbawlna nghawng thil a nih phei chuan a rang lama pawmpui tur a ni zawk" tiin, Governor chu constitution-in mawhphurhna a pek hlen loah a puh.

Kerala sorkar hian Governor-in bill pariat ngawt a kawl tan zinga bill pathum hi kum hnih chuang pawmpui lohin a awm tawh niin an sawi. Bill tang zingah hian state sorkar hnuaia university-a Chancellor ni lai, Mr. Khan ban tirna tur pawh a tel.

CM Pinarayi Vijayan kaihhruai Kerala sorkar leh Kerala Governor inkar boruak hi a ṭha hleithei lo a, thil dang tam takah pawh an lo inchhal fo tawh a ni. Governor hian CM chu Raj Bhavan-ah pawh amah kal duh lo a, cabinet minister dangte tir ṭhinah a lo puh tawh bawk. Tuna bill tang chungchang hi Tamil Nadu-a rorel lai DMK-in Tamil Nadu Governor bill kawl tang luia an puhna aṭanga rawn irh chhuak ve leh niin, Tamil Nadu sorkar hian bill 12 Governor-in a pawmpui duh lo niin an sawi. Kumin April khan Telangana pawhin an state Governor-in bill a pawmpui duh loh chungchang hi SC-ah an lo thlen tawh bawk. SC hian Article 200 ṭan chhanin bill chu pawmpuina nena thawn let vat turin a lo hriattir tawh a ni.