AAP-in kum 2022 UP inthlan an chuh dawn

Delhi chief minister leh Aam Aadmi Party (AAP) national convener Arvind Kejriwal chuan kum 2022 Uttar Pradesh assembly inthlanah an party chu an ding ve dawn tih a sawi.

Video conferencing kaltlanga thuthar theh-darhtute a kawmnaah Arvind Kejriwal chuan,"Kum 2022-ah chuan AAP chu Uttar Pradesh inthlanah an ding ve dawn a ni. Uttar Pradesh mi tam tak Delhi-a chengte chuan tun hnaiah khan Uttar Pradesh chuan Delhi anga sorkar ṭha, mipui tana thawk ṭha leh mipuite'n an hlawkpui ang hi an phu ve a ni tih min hrilh a ni," a ti. 

"Uttar Pradesh district hrang hranga mite chuan hriselna, zirna leh mamawh hrang hrang vangin eng vangin nge Delhi an rawn pan a ṭul? Chung chu eng vangin nge Uttar Pradesh-ah an hmuh loh? A chhan chu Uttar Pradesh-a political party zawng zawngte chuan mipui an phatsan vang a ni. Sorkar tinin eirukna kawngah midang an khum zel a ni. UP politics-ah hian thil ṭha tih duhna a awm lo. AAP chuan chu chu a thlak danglam thei a ni," tiin a sawi.

UP-ah hian Yogi Adityanath kaihhruai BJP sorkar a ding mek a ni. Kum 2017 assembly inthlanah khan BJP hi hneh taka thlan tlin niin, seat 403 awmna Assembly-ah BJP hian seat 309 a la pha a, Samajwadi Party-in seat 49, Bahujan Samaj Party-in 18 leh Congress-in seat 7 an la ve bawk.