Hripui leng vangin Parliament thlasik session a awm dawn lo

Ram puma Covid-19 hripui leng vangin Parliament thlasik session a awm dawn lo tih sorkar thuchhuah chuan a tarlang.

Parliamentary affairs minister Pralhad Joshi chuan Congress Lok Sabha leader hnena lehkha a thawnah political party zawng zawng chuan thlasik session neih loh chu an duh vek tih tarlangin, January-a budget session neih mai an duh tih a sawi. Hetih lai hian Congress chuan hemi chungchangah hian rawn an ni lo tih an sawi thung.

Congress leader Adhir Ranjan Chaudhary-in sawisel hlawh tak farm law chungchanga session neih a phut chu chhangletin Pralhad Joshi chuan party hruaitu zawng zawng a rawn hnuah Covid-19 vangin session koh loh mai chu an thutlukna a ni tih a sawi a, monsoon session September-a neih erawh session hlawhtling tak niin bill 27 lai pawm a nih thu a sawi a ni.

Thlasik hun erawh hripui leng vangin insiamrem a har hle tih a sawi a, tunhnaiah hri kai an pun thar leh avang leh a bik takin Delhi-ah hri kai an pun nasat avangin session chu neih a ni dawn lo tih Congress MP chu a hriattir.

Hetih lai hian Congress hruaitu hlun Jairam Ramesh chuan twitter-ah sorkar chu thudik lo sawiah puhin Rajya Sabha-a opposition leader pawh hemi chungchangah hian rawn a ni lo tih a sawi.