Kar thum chhungin Sri Sri-an a sum chawi tur pe dawn

Yamuna lui kama ni thum awh tur, World Culture Festi-val buatsaihtu, Sri Sri Ravi Shankar-a foundation, Art of Living chu National Green Tribunal chuang cheng vaibelchhe nga chawi turin a ti tawh a, heng sum chawi turte hi kar thum chhunga pe fel vek turin nimin khan a hriattir.

NGT chuan festival neihna tura atan hian Art of Living hian Yamuna tuipui kam chu nasa takin a tichhia a, hei vang hian cheng vaibelchhe nga chawi turin a ti a ni.

Foundation chuan nimin khan cheng vaibelchhe nga pek nghal tur a neih loh thu leh, cheng nuai 25 chauh a pek theih rih tur thu a hrilh a. A bak la awmte chu kar thum chhunga pe fel tura tih a ni ta a ni.

Ningani khan Sri Sri chuan thil tih dik loh an neih loh thu sawiin, tribunal-in sum chawitir a tum chu pek an tum loh thu leh, a ṭul a nih chuan jail-a an tan mai zawk tur thu a sawi. Hetianga thu a sawi avang hian nimin khan NGT chuan Sri Sri hi a khak nghal bawk a ni.

Festival hi nimin tlai dar 5 khan ṭan a nia, he festival chhim tumtu ram dang hruaitu eng emaw zat chuan an ṭhulh leh a ni. Festival-ah hian Zimbabwe President Robert Mugabe chu 'guest of honour' atana ruat ni mah se, kum 92 mi Mubage hian festival-ah hian a tel theih loh tur thu a sawi. Ram hruaitu, festival chhim tum
ṭhulh leh ta zingah han Sri Lanka President Maithripala Sirisena, Nepal President Bidhiya Devi Bhandari leh France Prime Minister hlui Vilepin-te an tel.

Ni thum chhung festival neih turah hian tel an tam tham dawn avangin venhimna lam pawh khauh taka kalpui a ni dawn tih official-te chuan an sawi. Festival neihna hmunah hian Delhi Police 6,000 vel duty tir an ni dawn a, anni bakah hian Economic Offences Wing (EOW) leh Special Cell-te pawh dah tel an ni ang. Eagle Commando team bakah official 1,500 an tel dawn bawk a, mi sawm bik leh artist-te thlenna hotel-ahte vengtu hi dah an ni dawn bawk a ni.