Vijay Mallya-a'n a tlanchhe lo tih a sawi

Mi hausa leiba ngah Vijay Mallya chuan, India ram a chhuahsan avangin a leiba te lak aṭangin a tlanchhia tihna a ni lo tih sawiin, danin a phut ang chu a tih zel tur thu a sawi.

Vijay Mallya hian a airlines tlachhe ta, Kingfisher Airlines tana bank 17 aṭanga a loan pukte chu a rul thei lo a, a loan bat hi cheng vaibelchhe 9,000 vel a tling tawh a ni. Bank-te hian Supreme Court-ah Vijay Mallya hi India ram chhuahsan khapsak tura ngenna an thehlut a, an ngenna hi ngaihtuah a nih laiin sorkar laipui chuan March 2 khan India ram a chhuahsan tawh tih a hrilh a ni.

Mallya hi London-a a inah a awm nia sawi a nimahse finfiah a la ni lo. Eptu pawlte chuan Mallya-an India ram a chhuahsan chungchangah sorkar laipui chu mawh-phurtuah an puh a, rukru ṭanpuituah angah an chhuah hial a ni.

Nimin zing khan Mallya hian a twitter-ah a leiba neih avanga tlanchhia a nih loh thu a sawi a, sumdawng mi a nih avangin zin chhuak reng a nih thu sawiin, dan te chu a zah hle tih a sawi bawk.

Enforcement Direc-torate (ED) chuan nimin khan dik lo taka sum thawnah puhin March 18-ah an hmaa inlan turin a hriattir. ED hian bank 17-te hnenah Kingfisher hnena loan an pek dan tar-lanna documentte thehlut turin a hriattir bawk.

Ningani khan ED chuan IDBI bank leh Kingfisher Airlines-a official eng emaw zat chu IDBI-in loan, cheng vaibelchhe 900 chuang a pek chungchangah thu zawh fiah turin a ko tawh a ni.