SC-in 'Bharat' tih hmang tura ngenna a hnawl

Supreme Court chuan sorkar laipui leh state hrang hrangten India tih aia 'Bharat' tih hmang tawh zawk tura ngenna, Public Interest Litigation (PIL) thehluh chu nimin khan a hnawl.

PIL thehluh a ngaihtuahna-ah, Supreme Court chuan mahni ngaihdan leh rilru-a awm ang zawng zawng chu court-ah kalpui vek a dik ber lo tih a sawi.

Chief Justice of India, Justice TS Thakur chuan petition hi hnawl a nih thu sawiin, mi tu pawin India tia sawi a duh chuan a sawi mai ang a, Bharat tia sawi duh pawhin an duh angin an sawi mai tur a ni, a ti.

Supreme Court hian nikum April thla khan sorkar laipui leh state sorkarte hnenah official leh official lo thil reng rengah pawh India tih aia 'Bharat' tih hmang zawk tura ngenna thehluh chungchangah an ngaihdan sawi turin a lo hriattir tawh a ni.

PIL thehluttu hi Niranjan Bhatwal a ni a, sorkar kaihhnawh thila India tih hman chu khap vek turin a ngen bawk a ni.