NCERT zirlaibuah inthlan zirtirna lam dah dawn

Education Ministry leh Election Commission of India (ECI) chuan Ningani khan Memorandum of Understanding (MoU) ziakin, National Council of Education Research and Training (NCERT) zirlaibuah inthlan chungchang zirtirna lam hawi zirlai dah an tum. NCERT chuan zirlaibua zirlai belh bakah zirlaibu thlak a ngai dawn niin an sawi a, State Education Board te hnenah pawh an tihdan ang zawm ve turin an hriattir tur thu an sawi.

NCERT zirlaibua inthlan pawimawhna leh inthlan awmzia zirtirna belh turah hian ECI chuan Systematic Voters' Education and Electoral Participation (SVEEP) chu sikul leh college zirlai thlenga dah an duh thu an sawi a, pawl 6 zirlai aṭanga pawl 12 thlenga kalpui hmasak tum a ni. MoU-a tarlan a nih danin, inthlana vote thlaktute pawimawhna chu khawpui leh thingtlang ṭhalaite rilruah tuh an tum thu an tarlang. ECI senior official chuan Lok Sabha inthlan hnuhnung berah khan vote thlak thei mi mtd. 910 zingah mi mtd. 297 zetin vote an thlak loh thu sawiin,"MoU hi kan ram ṭhalaite rilrua zirlaibu kaltlanga inthlan pawimawhna inzirtir nan ziah a ni. He hmalakna hian Election Commission chu inthlan a awm apianga vote tla a ṭhat theihna tur atana an hmalaknaah a puih theih beisei a ni," a ti.

Heng bakah hian inthlan pawimawhna zirtir thiam tura zirtirtute training pek te, Electoral Literacy Club din te chu MoU-ah ziah tel a ni bawk. ECI duh dan anga kum 18 tling thar apiang hnenah rang taka voter ID pek chhuah dan tur ruahmanna siam te, sikul leh college-a inthlan dan phung ziritirna lam hawi activity buatsaih ṭhin te chu ziah tel a ni bawk.