Food processing sector-in FDI aṭangin Rs. vbc 50,000 la lut

Prime minister Narendra Modi chuan Delhi-a Bharat Mandapam hmuna World Food India ṭum hnihna neih mekah thu sawiin, kum kua chhungin Foreign Direct Investment (FDI) aṭangin Rs. vbc 50,000 a lak luh tawh thu a sawi. World Food India hi ni thum awh tur niin November 5-ah a tawp ang.

Modi chuan," Kum kua chhung khan FDI aṭangin food processing sector hian vaibelchhe tam tak a la lut a, hei hi sorkarin industry a ngaihpawimawhna leh loneitute tana a thawhna lantirtu a ni," tiin, eitur sawngbawl tawh thawn chhuah chu 150%-a a pun tawh thu leh ram chhunga eitur sawngbawl theihna chu a pun nasat thu a sawi bawk.

World Food India 2023-ah hian 2023 chu International year of millets lawm nan hman a ni a, India chu eitur tamna hmun a nihna lantir a tum bawk. Kum 2017 khan a hmasa ber neih a ni a, Covid-19 hri leng avangin neih chhunzawm theih a ni ta lo thung a ni. He hunah hian ram hrang hrang 80 chuang aṭangin mi lo tel tura beisei a ni a, company lian leh lar, food processing company hlun tak tak aṭanga an CEO te an lo tel a ni.