Hyderabad court-in Mallya manna tur thupek tichhuak

Hyderabad Court chuan sumdawng lian, Vijay Mallya leh Kingfisher Airlines-a Chief Financial Officer A Raghunath-a bail theih loha manna tur thupek a tichhuak. 14th Additional Chief Metropolitan Magistrate GS Ramesh Kumar chuan police-te chu Mallya leh Raghunath-te hi April 13-ah court-ah hruai ngei turin a hriattir bawk.

Vijay Mallya hi bank 17-te hnena loan a lak, cheng vaibelchhe 9,000 vel zet a pek theih loh hnuah, dik lo taka sum thawnkualah puhin thubuai siamsak a ni. Bank intelkhawmte hian India rama chhuahsan phalsak lo turin Supreme Court-ah an ngen a, mahse an ngenna hi ngaihtuah a nih hian Mallya hian India ram a chhuahsan hman a, tunah hian UK-ah a awm mek a ni.

Mallya hian sum lama harsatna a tawh avangin Kingfisher Airlines hi a titawp tawh a, mahse airlines-a thawk tam takte hian tun thlengin an hlawh tur an la la thei lo a ni. Airlines-a thawkte chuan an harsatna tawh mek chungchangah Prime Minister Narendra Modi chu inrawlh turin ziakin an lo ngen tawh a, hemi hnu hian Supreme Court-ah an hlawh an lak theihna turin thubuai thehluh an tum bawk.

Sorkar laipui chuan Supreme Court-ah Mallya hian March 2 khan India ram a chhuahsan thu kar hmasa khan a hrilh a, hemi hnu hian Court chuan mail thawnin, a passport hrensak a nih lohna chhan tur chu kar hnih chhung ngeia sawifiah turin a hriattir a ni.

Mallya-an India ram a chhuahsan chungchangah eptute chuan BJP sorkar chu rukru ṭanpuiah puhin, na takin an sawisel. Hei hi a hnuah Mallya chuan a twitter
aṭanga chhangin, a tlanchhiat loh thu leh, sumdawng a nih avanga zinkual reng a nih thu a sawi. Sunday Guardian chanchinbu-in emai interview a neihpuina-ah, Mallya chuan a ṭhian tlawh tura zin a nih thu a sawi a, thilsual lian tak titu ang maia chhuah a nih chungchangah a leibatna bank-te a puh.

Loan tam tak a bat chungchang pawh sawichhuakin, Mallya chuan, "Loan lak chu sumdawnna thil a ni. Bank-te pawhin loan an pekchhuahin risk an la tih an hre ve tho. Hei vang hian thutlukna siamtu pawh keini ni loin bank an ni. Kan sumdawnna pawh a rawn ṭhang chho nasa hle a, mahse vawilehkhatah a tlahniam leh thut a ni" a ti.

Misual a nih loh thu sawiin, Mallya chuan thil ṭha thei anga tih a tum a, mahse a thusawite chu media lamten an lakkawih sak leh a hlauh avanga ngawi rih mai a nih thu a sawi.