Delhi primary school-te November 10 thleng khar

A zawna ni ruk chhung boruak bawlhhlawhin a tuam nasat tak avangin Delhi sorkar chuan an state-a pawl 5 chin tan November 10 thleng sikul khar tur a nih thu a puang. Pawl 6-12 te tan pawh sikul khar tur tih ni mah se, online class erawh phalsak an ni thung.

Kar hmasa khan Delhi sorkar hian primary sikulte chu November 5 thleng khar turin a lo ti tawh a, mahse, boruak ṭha an la neih hleih theih loh avangin sikul khar hun chhung hi a pawtsei ta a ni tiin Delhi education minister Atishi chuan a sawi.

Delhi khawpui boruak hi Pathianni pawh khan Air Quality Index (AQI) tehna aṭangin 460 a la kai a ni. Khawpui tuamtu, boruak paw leh chhum bawlhhlawhte chuan thawk lama harsatna leh mit lam tana natna a thlen theih tur thu doctor-te chuan sawiin, mi tin fimkhur turin an chah bawk.

Sorkar laipui pawhin Delhi-NCR huam chhunga boruak chhe lutuk tihziaawm nan hian boruak bawlhhlawh venna tur hmalakna hrang hrang an neihte hman a ngai a, truck khu nasa lutuk te, sumdawng lirthei ke li neite, in sak leh thil dang sak ang chi reng reng te pawh AQI 450 chung a nih chuan hman theih loh a ni. Delhi-a boruak chhe zual zel hi khaw vawt chho leh bawlhhlawh keng thli thaw vang bakah, Punjab leh Haryana vela thlai ro hal vang niin mithiamte chuan an sawi.