Criminal law bill draft report pawm dawn

Criminal law bill pathum; Indian Penal Code (IPC), The Code of Criminal Procedure, 1973 leh Indian Evidence Act, 1872 te thlakna tur atana union home minister Amit Shah-a'n session hnuhnung bera house-a a put luh, Bharatiya Nyaya Sanhita, Bharatiya Nagarik Suraksha Sanhita leh Bharatiya Sakshya Adhiniyam te zir chianna nei tura din, parliamentary committee chuan November 6 hian draft report pawmna an neih tur thu an sawi.

October 27 khan bill zir chianna nei tur panel, Brij Lal kaihhruai chuan draft report hi pawm tum mah se eptu party-te'n bill zir chian nana hun tam zawk an phut avangin an pawm thei lo a ni. Eptu party member ṭhenkhat chuan panel hun chhung chu thla thum atana pawhsei dil turin leh, inthlan dawn avanga hamṭhatna uma hetiang bill vawrh hi awm tawh lo turin Brij Lal hi an phut. "Mi te ber leh chan chhe ber tan pawha dan rualkhai tak zam a nih theih nan panel hian draft report hi tun thla chhung atan chuan pawm lo se kan duh. Pawm luih a nih chuan dan siamna kawnga he panel chet dan hi kan dem hle ang," tiin thuchhuah an siam.

Hetih lai hian BJP erawh chuan hun pek an nih anga thla thum ral hmaa draft peih hman an tum thu leh, zir chianna leh enhona chu nasa taka an neih tawh thu an sawi thung. Hei vang hian November 6-a inhmuh khawm a, draft report pawm hi an tum a ni. Panel hian heng criminal law bill thlakna tur atana dan an enho leh zir chianah hian thil ṭhenkhat thlak mah se, Hindi hming an pek erawh thlak an tum lo nia hriat a ni.