Naktukah Chhattisgarh inthlan thawh khatna

November thla chhung hian Chhattisgarh, Madhya Pradesh, Mizoram, Rajasthan leh Telangana te chuan state assembly inthlan an hmachhawn dawn a, state panga inthlang tur zinga phase khat ai tama inthlang tur awmchhun, Chhattisgarh chuan naktuk hian inthlan thawh khatna hi bial 20-ah an nei dawn.

Candidate-te affidavit theh luh aṭanga a lan danin, inthlan chuh tur mi 223 aṭanga mi 26 te chuan criminal case an nei a, hei hi 12% a tling pha. Candidate 16-te chuan criminal case serious tak an nei bawk a ni. Candidate-te hausakna, Association for Democratic Reforms (ADR)-in an tarlan danin candidate 46 (21%) te hi crorepati an ni a, inthlan chuh tur party lian zual zingah INC candidate 20 zinga 17 te chu crorepati niin, BJP candidate 20 zinga 14 leh AAP candidate 10 zinga 3 te chu crorepati an ni. Candidate zinga hausa ber chu AAP candidate, Kawardha constituency-a ding tur Khadgrai Singh niin, a sum leh thil neih hlutna zawng zawng hi Rs. 40,01,28,992 a tling. Candidate zinga rethei ber chu Kanker-a ding tur Parwati Teta leh, Mohla-Manpur-a din tur Nagesh Puram te niin, engmah an nei lo a ni.

Chhattisgarh phase I inthlan chuh tur mi 223 zingah hian ziak leh chhiar thiam lo pakhat awmin, ziak leh chhiar thiam ngawr ngawr mi 4 an awm bawk a, mi 97 te chu graduate leh a chung lam an ni. Kum 40 hnuai lam inthlan chuh tur mi 103 an awm laiin, kum 60 chung lam hi mi 22 an awm bawk. Phase I inthlan chuh tur zingah hian hmeichhia 25 an tel a, hmeichhe candidate zinga pariat hi Independent-a ding tur an ni thung. Party anga hmeichhe candidate nei hnem ber chu BJP leh INC niin pathum ve ve an nei a ni.

Chhattisgarh-ah hian kum 2018 inthlan khan Congress chuan BJP hnehin Congress hruaitu, Bhupesh Baghel chu chief minister atan lak luh a ni. Assembly seat 90 awmin phase I-ah hian seat 20 atan inthlanna neih phawt tur a ni a, phase II hi November 17-ah Madhya Pradesh ruala neih tur niin, seat 70 atan inthlanna neih leh a ni ang. Chhattisgarh Phase I inthlan turah hian Rajnandgaon costituency-ah candidate chuhtu tam berin mi 29-in an chuh dawn a, Scheduled Tribe tana reserved seat Chitrakot leh Dantewada ah chuhtu tlem berin, mi pasarih ve vein an chuh ang.