Vijay Mallya-a'n India-ah kir mai tum lo

Bank hrang hrang 17 hnena loan, cheng vaibelchhe 9,000 chuang batu, Liquor Baron Vijay Mallya chu UK-ah a awm mek a, a leiba avanga tlanchhia a nih loh thu a sawi rualin, India ramah kir leh nghal mai a la tum loh tih a sawi.

Kar kalta Zirtawpni khan Enforcement Directorate chuan dik lo taka sum thawnkual chungchangah Mallya hi March 18-ah an hma-a inlan turin a ti. Pathianni khan Hyderabad Court chuan Mallya lakah hian non-bailable warrant a tichhuak a, police-te hnenah April 13-ah court-a hruai ngei turin a hriattir bawk.

Vijay Mallya chuan a leiba avanga tlan-chhia ni loin, sumdawng mi a nih avanga zinchhuak a nih thu a sawi hnuah, India ramah chuan misual anga chhuah a nih avangin a tan kir leh mai chu a rem hrih lo tih a sawi. Hei vang hian March 18-a ED hmaa inlan tura hriattir ni mahse a inlamn hmel loh hle.

Hetihlai hian Attorney General Mukul Rohatgi chuan Mallya chu India rama rawn kirin, a passport pawh thuneitute kutah a theh-lut tur a ni, a ti. Supreme Court-in hriat-tirna a tihchhuahah, Vijay Mallya hi amah kher court-a inlan turin a ti lo a, a aiawh pawh a tir thei dawn a ni. Mahse Rohatgi chuan an hmalak zel dan tur chu Mallya-a ukil-in a chhan danah a innghat dawn tih a sawi a, "A mi chhanna chu a lungawi thlak dawn leh dawn loh ka hre lo. Mahse kan duh ber chu amah ngei hi rawn hawin a passport hi rawn thehluh tawh se" a ti.

ED chuan nimin khan Mallya-a airlines hlui, Kingfisher Airlines-a CFP hlui, A Raghunathan chu Mumbai-ah a ni thumna atan thu an zawtfiah leh. Raghunathan hi dik lo taka sum thawnkual leh, IDBI bank aṭanga Kingfisher-in loan cheng vaibelchhe 900 chuang a lak chungchangah thu an zawt a ni. ED hian Kingfisher Airlines tana loan petu, bank 17 te chu document pawimawh thehlut turin an hrilh tawh bawk.

ED hian Prevention of Money Laundering Act (PMLA) hnuaiah IDBI bank leh Kingfisher Airlines-a official eng emaw zat chu thu zawhfiah turin an ko tawh a ni.