Sorkarin reservation policy chhunzawm tum

Sorkar laipui chuan hnam bil puala sorkar hna leh zirna-ina reservation policy kalpui mek chu ennawn a ni dawn lo tih sawiin, policy hi hman chhunzawm zel a nih tur thu a sawi.

BJP peng pawimawh, Rashtriya Swayamsevak Sangh (RSS) chuan mi hausa leh awmtheite tan sorkar hna lakna leh zirna-inah reservation awm lo se an duh thu an sawi a, hei hi nimina Rajya Sabha inkhawmah eptute chuan an sawichhuak a ni. Mahse Rajya Sabha house leader leh finance minister Arun Jaitley chuan chhangin reservation policy hi chhunzawm a nih tur thu a sawi.

SP member Ram Gopal Yadav chuan sorkar laipui chu reservation system hman mek tihbo tumah a puh a, BSP hruaitu Mayawat pawhin ram danpuiin SC/ST leh OBC tana reservation pek tur chungchang hi chiang taka a tarlan laiin RSS chuan quota chu sum dinhmun aṭanga teha pek turin an sawi a ni, a ti. BJP in thuneihna a chan aṭangin quota chungchanga inhnialna hi a chhuak niin a sawi bawk.

RSS general secretary Suresh Bhaiyyaji Joshi-an Pathianni-a Rajasthan-a Naguar camp-a thu a sawiah quota chungchang hi a sawilang a ni. RSS hotu thusawi hi eptuten House-a an sawichhuah hian Jaitley chuan chutiang thu a sawi lo niin a lo chhan a, mahse eptute hian nasa takin an chhang zui a ni.

Deputy Chairman P J Kurien chuan RSS chu private organisation a ni a, member-te chuan an lo hlauhthawn vak a ngai lo tih a sawi. Mahse SP member, Yadav chuan RSS leh sorkar laipui chuan danglamna an nei lo tiin a chhang let thung.