Panel-in Kanhaiya leh zirlai dang pali hnawtchhuak turin rawt

Jawaharlal Nehru University (JNU) February 9-a campus chhunga ram dodalna thu aupui nia sawi chung-chang chhui tura a din, high level inquiry committee chuan zirlai panga-te chu university aṭanga hnawtchhuak turin a rawt. An zingah hian JNU students' union president, interim bail-a chhuak mek Kanhaiya Kumar leh, judicial custody-a awm mek Ph.D scholar pahnih Umar Khalid leh Anirban Bhattacharya-te pawh an tel.

Enquiry committe hian university-ah report theh-luhin, Kanhaiya leh zirlai dang pali-te chu university dan leh hrai palzutah a puh a, hnawtchhuak turin a rel a ni. Anni bakah hian midang ṭhenkhat chu sum chawi tura tih an ni a, zirlai 21-te chu an laka hremna lekkawh a nih loh chhan tur sawifiah tura tih an ni bawk.

JNU vice chancellor M Jagdesh Kumar chuan dean committee report leh rawtna siam chu ṭha a tih thu a sawi. Committee rawtna ang chuan zirlai panga-te hi campus chhuahsan a, an zirna pawh chawlhsan nghal tura hrilh an ni ang a, zirlai dang panga pawh hostel atanga chhuak tura hrilh an ni bawk ang.

Committee rawtna hi VC leh chief proctor A Dimri chuan an zir chiang leh ang a, thutlukna an la siam dawn a ni.

February 9-a campus chhunga firfiak khaihlum tak, Afzal Guru puala inkhawm buatsaihah ram dodalna leh sorkar laka hel zawnga thu sawi nia sawi a nih avangin, vice-chancellor chuan February 10 khan thil thlen dan chhui chiang turin proctorial enquiry a din a, mahse February 11 khan high level committee-a thlak a ni. Report theh luh hun tura an hun pek chu ṭum hnih pawhsei sak an nih hnuin March 11 khan an thehlut ta a ni.

Committee report hmasa thehluh-ah hian zirlai pariatte chu hostel-an an awm zui phalsak nilo mah se, academic activities-ah an tel khapsak rawt a ni bawk.

University chuan committee hian zirlai ṭhenkhatte chuan university rules an bawhchhia tih lungrual takin an pawm tih a sawi a, 'University chuan hetiang thil thleng hremna tur dan a nei a ni. High level inquiry committee rawtna siam pawh hi JNU rules and conduct behchhana siam a ni' a ti.

Hetihlai hian JNUSU vice president Shehla Rashid Shora chuan committee chuan a thil chhui hna chu langtlanga a kalpui loh avangin report a thehluh pawh chu an pawm thei dawn lo tih a sawi. Committee-in a chhui zui, zirlaite 21 te pawh hian committe hian an insawifiahna engmah a ngaithlak sak lo niin an sawi bawk.

JNU faculty association hotu, Ajay Patnaik pawhin committee chu action la tura rawtna a siamna chhan finfiahna a neihte chu puangzar turin a phut. Insawifiah tura hriattir, zirlai 21-te pawhin report kimchang chu mipuite hriat theih tura tlangzarh turin an phut bawk.