Maha Deputy CM hlui man

Maharashtra Deputy Chief Minister leh National Congress Party hruaitu, Chhagan Bhujbal chu eiruk thubuai avangin Thawhṭanni zan khan man a ni a. Nimin khan Mumbai Sessions Court-a Special PMLA Court-ah hruai a ni.

Bhujbal hi Delhi-a state guest house, Maharashtra Sadan sakna tur contract peknaah leh PWD minsiter a nih laia sorkar project hrang hrang thawhnaah sum tam tham tak a eiru nia puh a ni.

Enforcement Directorate chuan Thawhṭanni zan khan Bhujbal hi Maharashtra Sadan scam chungchangah darkar 10 zet thu an zawhfiah hnuah an man a ni. ED chuan Bhujbal hian sum a dawn zinga ṭhenkhat chu ram pawn lamah a chheprelh hnuin, company hrang hrang kaltlangin India ramah a la lut leh niin a sawi.

Bhujbal leh NCP chuan an puhna hi thu dik lo a nih thu leh, Maharashtra-a rorellai, BJP kaihhruaiin politics lama phubalak a tumna hmanrua mai niin an sawi thung.

NCP thupuangtu, Jitendra Ahwad chuan, "Kan party hotu Sharad Pawar leh party member-te chuan Bhujbal-an hun khirh tak a tawh lai hian kan thlawp tlat a ni" a ti.

Kum 68 mi, Chhagan Bhujbal hi politician chak tak a ni a, Shiv Sena leh Congress party member pawh a lo ni tawh ṭhin. Sharad Pawar-a party, NCCP a zawm hnuah pawh hruaitu pawimawh tak a ni chho nghal a ni.