EC-in Bengal sorkar fakna poster lak thlaktir

Election Commission of India chuan West Bengal state chhung hmun hrang hrangah Mamata Banerjee-i kaihhruai sorkar fakna banner leh hoarding tarte chu rang taka la thla turin thupek a tichhuak.

EC hian West Bengal-a political party hrang hrang aiawhte meeting a neihpui hnuah, Thawhṭanni zan khan he thupek hi a tichhuak a, official-te chu thupek zawm turin a hriattir nghal bawk.

West Bengal-ah hian Trinamool Congress sorkar hnathawh leh hlawhtlinna hrang hrangte chu sorkar building-ahte lian tak taka tarchhuah a ni. March 4 khan assembly inthlan neih tur puan niin model code of conduct hman nghal ni mah se, official te chuan hma an la ngam lo nia sawi a ni.

Hetihlai hian nimina Lok Sabha rorel inkhawmah West Bengal-a Trinamool Congress MLA leh minister-ten thamna an la ṭhin nia sawi chungchang chu party dangten chhuichian an phut thu an sawi. Narada news.com chuan TMC hruaituten thamna an lak dan hi kum hnih chhung a lo record niin a sawi a, a video hi a tichhuak a ni. He video-ah hian TMC minister leh MLA panga-ten thamna an la lai tihlan an a, politician-te hnenah hian nuai 70 chuang zet pek an nih thu tarlan a ni bawk. Mahse Chief Minister Mamata Banerjee chuan hei hi eptuten inthuruala an beihna niin a sawi a, video tichhuaktu chu khinah a vau bawk.