JNU zirlai pahnihte tan hun pawtsei

Jawaharlal Nehru University (JNU) zirlai pahnih, university campus chhunga India dodalna leh helna thu sawia puha mante chu Delhi Patiala House Court chuan an tan hun pawtseiin, March 18 thleng judicial custody-a awm turin a rel.

Nimin khan zirlai pahnih, Umar Khalid leh Anirban Bhattacharya ten bail-a chhuah an dilna chu magistrate-in a ngaihtuah a, mahse he hunah hian zirlaite himna lam venthawn avangin court-ah inlan loin, video conference hmangin an inlan a ni.

Zirlai pahnihte bail dilna hi Delhi Police chuan an dodal thung a, police ukil chuan heng zirlai pahnihte laka thubuai siamsak chu a dik ngei a ni tih finfiahtu mi 10 an nei tih a sawi. Delhi Police-te chuan ram dodal zawnga thu sawi tiin, thubuai an siamsak dawn hian campus-a inkhawm buatsaih lai video footage ringawt chu ring loin, mita hmutu mi 10-te thusawi pawh an la thlap tih an sawi.

Umar Khalid leh Anirban Bhat-tacharya-te ukil chuan zirlai pahnih-te hian ram dodalna thu ni loin, sorkar sawiselna thu an sawi zawk niin a tarlang. An ukil chuan, "Mi tupawhin sorkar leh a policy te chu sawisel turin dikna a nei a, sorkar sawisel avangin hela inpuhna ngawt tur a ni lo. Umar leh Anirban-te pawh hi anmahni duhthu ngeia court-a inpe an ni a, court-in an thusawite pawh a lo record vek tawh a ni" a ti. Police-te chuan campus-a inkhawm buatsaih laia India dodalna thu lo sawitu, pawn lami mite chu an la man thei lo niin a sawi bawk.

JNU-in February 9-a campus chhunga inkhawm buatsaiha India dodalna leh helna lam thu sawi nia puh chungchang chhui tura a din, high-level inquiry committee chuan campus chhunga Pakistan fakna thu sawitute chu hmaituam, university pawn lam mi a nih tih a sawi. Professor Rakesh Bhatnagar-a kaihhruai member panga awmna committee hian India dodal zawnga thu sawitute chu pawn lam mi ni mah se, campus chhunga zirlaiten inkhawm an buatsaiha pawn lam mi an tel leh, thu ṭha lo tak tak an aupui chu thil vanduaithlak tak a ni, a ti.

Committee chuan firfiak Afzal Guru puala inkhawm buatsaih tum, ṭhulh tura tih a ni chuanga kaltlangpui a ni chu dan palzutna a ni, a ti. Hemi rual hian university security unit lam pawh an inthlahdah nia sawiin, pawn lam aṭanga campus chhunga lutte chu an dan theih loh bakah, India dodal zawnga an au hnuah pawh an chhuak tur chu lo dan an tum lo niin a tarlang.

Enquiry Committee chuan JNU Students' Union president Kanhaiya Kumar chu inkhawm buatsaihah hian ṭan hnu daihah a thleng tih a sawi a,mahse he inkhawm buatsaih tum ṭhulh tura thuneituten an hriattirna chu a lo dodal niin a sawi.

Committee report chuan inkhawm huaihawttu zinga mi, Umar Khalid chuan university thuneitute hnenah hian programme siam chu eng ang pawha kaltlangpui an tum thu sawiin, security-te pawh an duh ang angin an che thei tih a hrilh niin a tarlang. Report chuan inkhawm huaihawttute hian university hriattirna an zawm loh avangin hei hi dan bawhchhiatna a tling a ni, a ti.