Rajasthan University Kashmir zirlai pali kut thlak

Rajasthan University-a Kashmir zirlai pali chu an hostel room-ah bawngsa siama puh an nih avangin na taka kut thlak an ni.

He thil thlenna hmun hi Chittorgarh-a Mewar University-ah a ni a, state khawpui Jaipur aṭanga darkar nga vel kal a ni. Thawhṭanni zan khan zirlai pali-te hian an hostel room-ah sa an ei chu zirlai dangten an hmuhin bawngsa eiah an puh a, kut an thlak zui nghal a, pawn lam mite pawh an hrilh darh a ni.

Hostel-a buaina a thlen hnu hian police-te koh nghal an ni a, police-te chuan kutthlaktute hi an dang a ni. He thil thlen lai hian Hindu activist
ṭhenkhat chuan campus hi an thleng ve nghal a, bawngsa eia puh zirlaite chungah an lungawi loh thu an lo aupui a ni.

Police-te chuan zirlaite sa siam chu enfiah turin forensic department hnenah an thawn nghal a, mahsa an sa ei hi bawngsa ni loin kelsa zawk a ni tih finfiah a ni.

University media liaison officer Harish Gurnani chuan an university-ah chuan ramchhung state 23 aṭangin zirlai an awm a, nunphung in ang lo tak takte an nih avangin hetiang buaina tenau hi chu a chhuak ve fo niin a sawi. Hostel chhungah chuan sa ei hrim hrim an phal loh thu sawiin, sa an lo ei vang-in zirlaite chungah action lak a ni dawn tho tih a sawi.

Hetihlai hian state danga Kashmir zirlaite chuan enhran leh rinhlelh an hlawh bik fo niin Jammu and Kashmir Chief Minister hlui Omar Abdullah chuan a sawi.