Vijya Mallya-a in lilam

State Bank of India kaihhruai bank 17 intelkhawmte chuan Vijay Mallya-an Kingfisher Airlines tana loan tam tham tak a batsak avangin nimin khan Mumbai-a Joseghwari-a a in, Kingfisher House an lilam sak.

Vijay Mallya hian sum lama a tlakchhiat avangin Kingfisher Airlines hi a titawp tawh a ni. Nimina Mumbai-a a in an lilam sak hi Kingfisher headquarters atana hman ṭhin a ni a, online hmanga lilam a ni. Bank-te hian Securitisation and Reconstruction of Financial Assets and Enforcement of Security Interest (SARFAESI) Act, 2002 hnuaiah Mallya in hi an lilam a ni.

Mallya hi an lilam sak hi cheng vaibelchhe 150 hua chhut a ni. Hetihlai hian bank hrang hrang aṭanga loan a puk hi cheng vaibelchhe 6,963 a ni a, a pungte nena a rulh ngai zat chu vaibelchhe 9,000 a chuang tawh.

Bank-te hian local court-a an khin hnuah Mumbai-a Mallya in hi an laksak a, hei bakah hian Goa-a Kingfisher Villa, cheng vaibelchhe 90 man chu an laksak bawk. Kum 2012 March thlaa Forbes-in mi hausa list a tihchhuahah Mallya hi 45-na niin, a hausakna hi dollar tluklehdingawn khat hu-a chhut a ni. Mumbai, Goa, Delhi leh London-ah te in ropui tak tak a nei. Luxury car eng emaw zat leh yatch a nei bawk.

Mallya hnena loan petu bank-te hian cheng vaibelchhe 6,963 an puk tir aṭang hian a share leh thil neih ṭhenkhatte an hralhsak aṭangin cheng vaibelchhe 1,600 vel an hmu kir tawh.

Kingfisher Airlines hnena loan petu hrang hrangte chu - State Bank of India in cheng vaibelchhe 1,600, Punjab National Bank leh IDBI Bank-in vbch 800 ve ve, Bank of India-in vbch 650, Bank of Baroda-in vbch 550, Central Bank of India-in vbch 410, UCO Bank-in vbch 320, Corporation Bank-in vbch 310, State Bank of Mysore-in vbch 150, Indian Overseas Bank-in vbch 140, Federal Bank-in vbch 90, Punjab & Sind Bank-in vbch 60 leh Axis Bank-in vaibelchhe 50 te a ni.

Nimina Kingfisher House lilam hi cheng vaibelchhe 150-a bithliah nghal a ni a, chhangtu an la awm lo nia sawi a ni. He in hi Vile Parle biala awm a ni a, square feet 17,000-a biala zau a ni. Lilam ni khat niah chhangtu an awm loh avang hian bank-te hian meeting neiin, in man an bithliah chungchang hi an ennawn dawn. Online hmanga lilam buaipuitu hi SBICAPS Trustee a ni.

Hetihlai hian Mallya hi UK-ah a awm mek nia sawi a ni a, media lamah a leiba ngah avangin a tlanbo nia sawi chu twitter hmanga chhangin, a tlanchhiat loh thu a sawi. Enforcement Directorate chuan Mallya hi an hmaah inlan turin a ko a, a ukil tir loa amah ngei inlan turin a hriattir.

Union Finance Minister Arun Jaitley chuan bank-te chuan Mallya hnena loan an pek chu a bo a bang awm loin an la hmuh kir vek tur thu a sawi a, investigative agency-te chuan Mallya hian dan a bawhchhia tih an hmuhchhuah phawt chuan a chungah na taka action an lak tur thu a sawi.