Kanhaiya bail cancel turin court-ah ngen

Jawaharlal Nehru University Students' Union (JNUSU) President Kanhaiya Kumar chu India dodal leh hel zawnga thu sawiah puh a nih hnuin man ani a, tunah hian interim bail-a chhuah mek a ni.

Hetihlai hian Kanhaiya Kumar hnena interim bail pek chu cancel sak turin Delhi High Court-ah petition thehluh a ni a, March 23 hian ngaihtuah a ni ang.

Kanhaiya bail cancel tura ngenna thehluttu hi Prashan Kumar Umrao a ni a, Kanhaiya hian interim bail a dil dawn khan affidavit dik tawk lo a thehlut niin a sawi. Vineet Jindal tih pawhin Kanhaiya bial cancel sak tura ngenin court-ah petition a thehlut bawk. Jindal chuan, Kanhaiya chu bail-a chhuah tir a nih hnuah India sawichhe zawngin thu a sawi a, bail-a chhuah tir a nih dawna intiamkamna te a bawhchhia a ni, a ti.

Delhi Court chuan vawiin hian India dodalna thu sawia puha man, DU lecturer hlui SAR Gilani a ngaihtuah ang. Gilani hi press club-ah India dodal zawnga thu sawia puh a nih avangin February 16 khan man a ni a, judical custody-ah dah mek a ni.

Gilani hian February 19 khan bail hi a lo dil tawh a, mahse a dilna hi magisterial court chuan a hnawlsak. Police-te chuan JNU campus-a firfiak Afzal Guru puala zirlai
ṭhenkhatten inkhawm an buatsaih tuk, February 10-a press club-a hun hmannaah Afzal Guru fakna thu te an aupui leh niin an sawi. Press club hall-a hun hman hi Gilani hminga book a ni a, hei vang hian police-te chuan IPC section 124A, 120B leh 149 hnuaiah thubuai an siamsak. Hall-a hun an hmanah hian Parliament beitu firfiak Afzal Guru leh Maqbool Bhat-te thlalak tar a ni a, martar tiin an sawi

SAR Gilani hi kum 2001 khan firfiakten parliament an beih kaihnawihah thu zawhfiah tura man a ni tawh a, mahse kum 2003 October thla khan Delhi High Court chuan an puhna finfiahna tur a awm lo nia sawiin thiam a chantir a ni.