Inkharkhip chhan leh tum ber A hlawhchham: Rahul Gandhi

Congress party hruaitu Rahul Gandhi chuan nimin khan thuthar thehdarhtute kawmin, ram puma inkharkhip neih a nih chhan leh tum ber chu a hlawhchham tih a sawi.

"Hri nasa taka a darh zual mek laia inkharkhipna hlip ram awmchhun chu India a ni tia" sawiin, inkharkhip neih chhan leh a tum ber chu India ramah chuan a hlawh­chham a ni." a ti.

PM Narendra Modi chu a hmaa lockdown-in nunna sang chuang a chhan dawn a ni tia sawi chungchangah bei bawkin 'lockdown stage pali hian Prime Minister beisei ang nghawng a nei lo' tiin a sawi. 

Rahul Gandhi chuan Modi kaihhruai sorkar chuan engtin nge hma a lak zel dawn tih zawtin, "Sorkar laipui hian hri darh nasa taka pung mek zel karah hian engtin nge hma a lak dawn? India-a inkharkhip hlih chungchangah hian eng ruahmanna nge a neih, engtin nge mahni state-a haw mekte hi ṭanpui a tum?" tiin zawhna a siam a ni.

PM hian a ruahmanna hmasa hi a hlawh­chham tih a pawm tur a ni. Hnungzawngin a kal mek a, hma lam pan turin ka ngen a ni. Thla hnih liam ta khan ni 21 chhung Covid-19 kan do dawn tih a sawi a, ni 21 chhungin hripui hi hneh theih a inbeisei a ni, a ti. 

Wayanad MP chuan,"Sum hmuhchhuahna leh capital kan mamawh a ni, a nih loh chuan a vanduaithlak hle ang. Hna tlem vanga rampumin harsatna a tawh mek chu coronavirus buaina hian a belhchhah a ni," tiin a sawi. 

State-te chu sorkar laipui chuan nasa zawkin thlawp se a duh tih a sawi a, Congress rorelna state-te chu an ṭanpui a nih loh chuan harsatna an tawk nasa dawn hle niin a sawi bawk. 

India ramah Covid-19 kai chu nimin thleng khan mi  1,45,380 an tling tawh. 

Thawhṭanni khan ram pumah hri kai hmuh chhuah thar mi 6,535 an awm leh a ni. He hri vanga thi hi mi 4,167 an tling tawh bawk. 

Maharashtra, Gujarat, Tamil Nadu leh Delhi-te chu hri kai tam zualna state an ni a; Bihar, Uttar Pradesh, Madhya Pradesh, Odisha leh Jharkhand-ah Covid-19 kai an pung chho chak hle bawk. Sorkar laipuiin  hri leng vangin ram pumah kharkhipna, thla hnih chuang a kalpui tawh chungin nitin hri kai thar hi an la pun belh zel a ni. 

Sorkar laipui chuan hri darh tur venna atan hian March 25 khan ni 21 chhung ram pumah inkharkhipna, lockdown kalpui a nih  thu a puang. Hemi hnu hian lockdown hi ṭum thum pawhsei ni tawhin, lockdown 4.0 hman mek chu May 31 thleng kalpui a ni ang.