Sorkar ads-ah CM leh governor thlalak dah phalsak

Supreme Court chuan kum 2015-a thupek a lo tihchhuah tawhte chu nimin khan siam-ṭhain, sorkar advertisement tihchhuah-ah governor, chief minister leh minister-te thlalak dah a phalsak.

Kum 2015 khan Supreme Court chuan sorkar advertisement reng rengah Prime Minister, President leh Chief Justice of India thlalak bak tarlan phal a ni lo tiin thupek a lo tichhuak tawh a ni.

Supreme Court chuan sorkar policy leh a hlawhtlinna hrang hrang tarlana politician-te thlalak dah tel vak vak chu mimal chawilar tumna a ni thei a, hei hi democracy kalphung tur a ni lo, tiin a sawi a ni.

Mahse court thupek hi sorkar laipui leh state sorkar ṭhenkhat, Assam, West Bengal, Tamil Nadu, leh Karnataka-te chuan ennawn tura ngenin petition an thehlut a ni. Sorkar laipui chuan a petition thehluh, advertisement azirin thlalak tarlan tur chu sorkar kutah a awm tur a ni a ti a, sorkar policy chungchangah court chu a inrawlh tur a ni lo, a ti. "Advertisment-a prime minister thlalak dah phal a nih chuan, chief minister-te thlalak dah khapsak a nihna chhan tur a awm lo. Chief Minister-te pawh hi an pawimawh em em a ni" tiin a sawi.

Petition thehluhte hi a ngaihtuah hnuah, Justice Ranjan Gogoi-a kaihhruai bench chuan nimin khan thupek lo tihchhuah tawh hi a siamṭha ta a ni.