Sipaiten J&K-a an ram luah chhuahsan dawn

Indian Army chuan Jammu and Kashmir-a ram zau tak tak an luah pali-te chu tun thla tawp hian a chhuahsan dawn.

Ningani zan khan Governor NN Vohra leh Lt Gen DS Hood, GOC-in-C Northern Command-te chu an inbia a, he hunah hian Chief Secretary BR Sharma leh senior official-te pawh an tel. Meeting-ah hian People's Democratic Party (PDP) hotu Mehbooba Mufti-in an state-a sipaite ram luah chhuahsan leh, AFSPA hman mek hlih a phut chungchang chu an ngaihtuah a ni.

Meeting hian Northern Command of Army ten ram an luah pali-te chu chhuahsan an remti ta a ni. Sipaiten an ram luah an chhuahsan turte hi Jammu University bula ram acre 16.30-a zau te, Srinagar-a Tatoo Ground-a ram acre 212-a zau, Anantnag-a High Ground ram kanal 456.60 leh Kargil-a Khuba Thang chuan hnuai lama ram an luahte a ni a, heng ramte hi J&K sorkar kutah an pe vek dawn a ni.

Governor chuan sipaite ram luahte sorkar kuta pek kir a nih theihna tura ṭul leh pawimawhte buaipui turin Chief Secretary kaihhruai Committee chu Jammu University, Kargil leh Anantnag te tlawh turin a hriattir bawk.

Meeting-ah hian sipaiten ram leh building dang an luah chung-changte pawh sawihoin May 31 hmaa thutlukna siam an rel tel bawk. Hemi chungchang hi relfel a nih hma chuan Chief Secretary Committee chu hunbi fel tak neiin an inhmukhawm
ṭhin dawn a ni.