Tangkhang mi nuai 40 chuang hruai haw tawh

Indian Railways chuan May 1 aṭang khan mahni state pawna inhlawhfa, Covid-19 leng vanga tangkhang mi nuai 40 chuang chu Shramik Special train 3,060-a phurh haw an ni tawh tih a tarlang.

Shramik Special train hi 453 la tlan chhunzawm tir an ni a, Pathianni khan rel 237 tlantir niin he rel-ah hian khualzin mi nuai 3.1 vel phurh a ni. State sorkarte ngenna angin state pawn lama inhlawhfaa awm te leh midang tangkhangte chu he special train hmanga hruai hawn mek an ni.

He special train-a hawte hawnna man hi sorkar laipui chuan 85% a tumsak a, a bak 15% chu state-te tum tura tih a ni. Railways ministry chuan May 23 leh 24 khan rel tlan a tam avangin rel kawng a tawt hle  thu a tarlang a, tunah erawh chuan a ziaawm leh tawh tih a sawi. Ni li liam ta chhung khan nitin rel 260 vel a tlan tlangpui niin Railways ministry chuan a tarlang bawk.

 

Sorkar laipui chuan tangkhang hawna tur special train hi buatsaih mah se, rel chuan man tur neih loh avangin inhlawhfa tam tak chu kein an haw a, an hawna lamah chetsualna tawk vanduaia thi zui ta sawi turte pawh an awm nual bawk a ni.