Uttarakhand sorkar fiah dawn

Uttarkhand Governor Krishna Kant Paul chuan Chief Minister Harish Rawat chu a kaihhruai sorkarin MLA thlawptu a ngah tawk em tih March 28 hian assembly-ah fiah turin a hriattir.

Uttarakhand-a rorellai, Congress party MLA 36 zinga MLA pakua an hel a, heng MLA helte hian BJP an thlawp avangin BJP chuan sorkar thar a siam thei dawn niin an inchhal.

MLA 70 awmna House-ah Congress hian MLA 36 a neih bakah , Progressive Democratic Front MLA parukin an thlawp bawk. Eptu party BJP hian MLA 28 a nei.

CM Rawat chuan House-ah majority a la nei tih sawiin, MLA helte hian an party hi an la chhuahsan lo tih a sawi.

Uttarakhand Speaker Govind Singh Kunjwal chuan Congress MLA hel 9-te hi hriattirna pein, MLA an nihna hlihsak an nih lohna tur chhan leh, eptu party BJP an thlawpna chhante sawifiah turin a ti. He hriattirna hi kar kalta Inrinni khan Dehradun-a MLA-te chenna bangah tar a ni a, ni sarih chhung hun pek an ni.

Speaker-in hriattirna a tihchhuahah hian MLA 9-te chuan party kalphung kalhin, sorkar dodal zawnga chetnaaah BJP an zawmtih a sawi. Hei bakahhian heng MLA-te hian BJP MLA-te nen Governor hnenah sorkar lakah complain an thehlut bawk a ni, a ti.

Congress MLA hel 9-te hian chief minister hlui Vijay Bahuguna kaihhruai BJP an thlawp chuan, MLA 28 nei sa BJP hian sorkar thar a siam thei dawn a ni. BJP hian BSP MLA pahnih pawhin an thlawp dawn niin a sawi.