Jharkhand-ah bawng zuartu pahnih khaihlum

Jharkand-a Jhabar khuaah Muslim mi bawng zuartu pahnih chu khaihlum an ni a, tualthattua puh mi panga chu man an ni tawh a, midang pathum zawn mek an ni.

Kar kalta Zirtawpni zing khan bawng zuartu, Mohammad Majloom (35) leh Inayatullah Khan (12) te chu thingkunga khaihluma hmuh an ni a, heng mi pahnihte khaihlumtua puh man zinga hian bawng humhalhtu pawl member pawh an tel.

Police-te chuan mi panga an mante hian Chatra district-a fair neihnaa an bawng hralh tuma kal mi pahnihte hi an lo that niin an sawi. An zingah hian bawng humhalhtu pawl member an tel avangin midang inhnamhnawih an awm leh awm loh pawh an chhui nghal thu police-te chuan an sawi.

Tualthahna rapthlak tak thleng vang hian kar kalta Inrinni khan Latehar district-ah lungawi lohna lantir a ni. Mipui lungawi lo te hian police-te chu lungin an tawng a ni.

Congress party chuan he tualthahna rap-thlak tak thleng hian state-a BJP kaihhruai sorkar hlawhchhamna a tarlang niin an sawi. JVM chief Babulal Marandi pawhin BJP rorelna hnuaiah an state chu dan mumal awm lohna state-ah a chang tawh a ni, a ti bawk.