Delhi boruak chhia avangin lirthei intlan chhawk dawn

Delhi environment minister Gopal Rai chuan Delhi khawpui boruak bawlhhlawh zual zel tur venna kawng khat atan, November 13 aṭangin lirtheite chu odd-even number intlan chhawktir an ni dawn tih a sawi. Hei bakah pawl 10 leh 12 tiam loin Delhi-a sikul zawng zawng chu pawl 11 chin thlengin November 10 thleng khar a nih tur thu a puang bawk.

Delhi hi boruak chhiain a la tuam mup mup reng a, kar khat dawn a liam hnuah pawh boruak bawlhhlawh hian ziaawm lam a la pan thei lo. Mithiamte chuan mipuite tana thawk lamah harsatna a siam an hlauh thu leh, mit lama harsatna a thlen a hlauhawm thu an sawi. Tun dinhmunah diesel truck te chu tlan phal a ni rih lo a, in sakte pawh chawlhtir vek an ni.

Environment Minister chuan BS3 petrol leh BS4 diesel hmang lirtheite chu khap chhunzawm a nih tur thu a tarlang a, halpuah hal pawh khapin, chhum bawlhhlawh chhem kianna tur (smog gun) pawh an bun tawh thu a sawi bawk. Kejriwal sorkar hnuaia kum danga boruak chhia siam ṭhat nana an lo tih ṭhin, even number leh odd number-a tawp lirtheite intlan chhawktir chu kalpui leh an tum thu a sawi bawk. He dan hi November 20 thleng hman phawt tur a ni a, a hnu lam hi chu an la rel chawp leh ang.

Delhi pumpuia boruak bawlhhlawh zawng hi lak rualin AQI-a 488 a ni a, hei hi WHO-in a him chin a sawi aia a let dawna sang a ni. RK Puram, ITO, Patparganj leh New Moti Bagh te chu boruak chhiat zualna an ni. Delhi boruak chhia mipuiin an hip hi mithiamte chuan a chhiat em avangin mi pakhatin ni tin meizial tlawn 25-30 zu anga ngaih theih an ni, an ti.