CIC hotu atan Heeralal Samariya la lut

President Droupadi Murmu chuan Information Commissioner, Heeralal Samariya chu Central Information Commission (CIC) hotu atan a la lut. Heeralal Samariya hi Chief Information Commissioner a ni tawh dawn a, he post hi October 3-a YK Sinha term a tawp hnu khan hnawh khah lohin hun eng emaw chen a awm. Samariya hi Dalit hnam zinga Chief Information Commissioner hmasa ber a ni.

Samariya lak luhna hun hi New Delhi-a Rashtrapati Bhavan-ah neih a ni. Supreme Court-in Right to Information dan bawhchhiatna a awm lohna tura October 30-a post hnawh khat tura central leh state sorkarte hnena hriattirna a pek hnuah, sorkar laipui hian Chief Information Commissioner atan Heeralal Samariya hi a rawt ta a ni.

CIC-ah hian Information Commissioner 10 an awm thei a, hei hi Chief Information Commissioner -in a ho ṭhin. Chief Information Commissioner atana Samariya lak a nih takah hian Information Commissioner post hi pariat a ruak a, tun dinhmunah Information Commissioner hi pahnih an awm mek a ni. CIC leh state hrang hranga SIC post ruak a tam avang hian Chief Justice D. Y. Chandrachud, Justices J. B. Pardiwala leh Manoj Misra te kaihhruai bench chuan hmalak tumin Department of Personnel and Training (DoPT) hnenah data hrang hrang an lo la khawm tawh bawk.