Haryana sorkarin zirlaite tan a thlawna kalna tur ngaihtuahsak dawn

Haryana chief minister, Manohar Lal Khattar chuan Pathianni khan 'Chatra Parivahan Suraksha' scheme tlangzarhin, he scheme hnuaiah hian an state-a thingtlang khuaa awm zirlaite tan sikul an kalna kawnga lirthei a thlawna an hman tur ngaihtuahsak an nih tur thu a puang.

CM hian Ratangarh khuaa Jan Samvad hun a hmannaah thu sawiin, transport department kaltlangin thingtlang khua aṭanga hmun danga sikul kal, zirlai 50 aia tam neite tan a thlawna an hman tur bus pek an nih tur thu leh, zirlai 30-40 awmte tan bus te chi an pe dawn tih a sawi. Hei bakah hian hmun hlaa sikul kal, zirlai panga aṭanga 10 inkar awmte chu transport department-in a ṭul anga an ngaihtuahsak tur thu a sawi bawk.

Chatra Parivahan Suraksha Yojana hi Ratangarh khua aṭanga bul ṭan tur a ni a, roadways department chuan he khua aṭang hian zing dar 7-a chhuak a, zirlaite haw lam thlah leh vek turin bus an tlantir nghal a ni. Zirlaite hian bus hi a thlawnin an chuang thei dawn a, district education department chuan senso zawng zawng hi an tum dawn a ni.

CM chuan Jan Samvad hmanga state sorkarin ward leh khaw hrang hrangte nena an thawhho ṭhat thu sawiin,"Kum kua ral ta chhung khan scheme hrang hrang hmanga hmalakna hnuaiah mi vbc 1 te tan hamṭhatna pek chhuah a ni tawh. Kan tum ber chu chan chhe zawk leh dinhmun hniamte tana lei rem an rah ve theihna tura hmalak hi a ni," tiin a sawi.