Sorkar laipuiin online-a inthapna application 22 khapna tichhuak

Ministry of Electronics and Information Technology (MeitY) chuan dan loa kalpui, online-a inthapna application leh website 22 te khapna thupek an tichhuak. Heng zingah hian Enforcement Directorate (ED) rawtna angin Mahadev Book Online leh Reddyannaprestopro te pawh an tel.

Sorkar laipui chuan,"Heng application-te khapna chhuah a nih hnu hian ED chuan dan loa inthapna kalpuitu zinga a bul tumtu leh hotute an chhui zui nghal a, Chhattisgarh-a Mahadev Book hmun pawh an luhchhuah nghal a, he application-in dan an bawhchiatte pawh finfiah nghal a ni," an ti. Chhattisgarh-a ED-in Mahadev Book an luhchhuahna kaihhnawihah hian Chhattisgarh police; Bhim Singh Yadav leh Asim Das te chu pawisa chheprelh thubuaia man an ni a, Prevention of Money Laundering Act (PMLA) hnuaia section 19-na hmangin thuneitute'n an kawl mek a ni. Minister of State for Electronic and IT, Rajeev Chandrasekar chuan hemi chungchangah hian Chhattisgarh sorkar chu a dem thu sawiin,"Chhattisgarh sorkar hian he inthapna application titawp tur hian thuneihna a nei a, Information Technology act, section 69A hnuaiah an khap thei reng a ni. An tihtawp loh mai bakah kum khat leh a chanve zet an chhui hnuah pawh sorkar laipuiah rawtna an siam lo a ni," a ti.

ED-te hian Mahadev application hi an la chhui zui zel a, Mahadev thuneitute'n chief minister Bhupesh Baghel hnenah Rs. vbc 508 pein, an application kalpui phalna an la nia sawi pawh an chhui zui mek thu an sawi.