Halpuah leh halmawi khapnain Delhi chauh a huam lo : SC

Supreme Court chuan Diwali lawmna neih a nih hmaa thupek a chhuahah, boruak bawlhhlawh leh bengchheng siam titlem tura halpuah leh halmawi hal khap a nih thu a sawi chu Delhi tan chauh ni loin, India rama state zawng zawngte zawm tur a nih thu a sawi.

Court hian thupek chhuah a nih hnu pawha Rajasthan-a boruak bawlhhlawh belh nasa lutuk avanga complaint theh luh chungchang a ngaihtuahnaah he thu hi a sawi a ni.

He thu ngaihtuahtu bench-a ṭhu, Justice MM Sundresh chuan,"Khawi hmunah pawh hunpui lawmna hi hman theih a ni a, mahse, a tawk te zelin ni rawh se. Mi pakhat hian midang tan lawmna a thlen thei a, mahse, chu lawmna chuan environment a tihchhiat phah kher a ṭul lo," a ti. Justice AS Bopanna pawhin naupang aiin puitlingin hunpui lawm dan an thiam loh zawk thu leh, midang tana hrehawm leh bawlhhlawh an siam pawh ngaihtuah loa halmawi hal chiam mai an chin thu a sawi a,"Sikul lama zirtirna an dawn ṭhat avangin naupang tam tak hi chuan halmawi hal lohte an ching tawh. Puitling zawkte hian an hal uar tawh zawk a ni. Hal hun chhung siamte pawh hi a ṭha lo. Hun tiam kan siam a zawh hmain hal zawk vek hman tumin an hal chiam tho ṭhin," a ti. Court hian thupek an chhuah chu state sorkar zawng zawngin hunpui chauh ni loah pawh boruak bawlhhlawh tihtlem nan leh bengchheng tihtlem nana an hmalakna tur a nih thu an tarlang a ni.

Rajasthan counsel chuan environment humhalh duhna hi khawtlang anga ngaihtuah leh thawhhona ni se an duh tiin,"Mi zawng zawngin halmawi tlem thei ang ber nena lawm kan tum tur a ni," an ti. Complaint theh luha a lan danin sorkar chuan environment humhalhna lama hmalakna hi mimal kutah a dah ngawt theih loh thu an tarlang a ni.