Jail tang leh tlawhtute tan Aadhar finfiahna siam tum

Jail tangte himna atan leh nihna lem hmanga inbumna a awm loh nan, Ministry of Home Affairs chuan ram chhunga tan in 1,300-ah Aadhar finfiahna kalpui an tum thu an puang.

Ministry of Home Affairs (MHA) chuan state leh union territories hrang hrang hnenah hriattirna thawnin, tan ina tangte leh anmahni tlawhtute tana Aadhar finfiahna kalpui turin a hrilh a, hei hi tangte himna atan leh inbumna a awm lohna tur a nih bakah Aadhar kaltlanga hamṭhatna an dawn turte an dawn theihna atan a nih thu an sawi.

MHA chuan Aadhar Authentication for Good Governance (Social welfare, Innovation, Knowledge) rules, 2020 hnuaiah jail tangte leh a tlawhtute tana Aadhar finfiahna kalpuina tur hian Prison department hnenah hriattirna an pe tawh a, National Informatics Centre (NIC)/ePrisons te'n inkaihhruaina dan pawh an zam tawh thu an tarlang.

"Tan ina venhimna leh inenkawlna hi tang an pun ve zel avangin thil hautak a tling chho ṭan a, NIC-in tan in enkawltute tana hman tur ePrisons an duan hi ram chhunga tan in 1,378 zinga 1,309-ah chuan hman a ni tawh. Tangte hriat leh anmahni enkawla tlawhtute hriat chian hi tunlai khawvelah chuan kan ngaihthah thiang lo thil a ni. ePrisons hian tangte hriat chianna kawngah leh tlawhtute bakah, nihna lem hmangte hriat hranna kawngah min pui thei dawn a, hei bakah, tan in enkalwna kawngah thuneitute nasa takin a pui thei dawn a ni," tiin an tarlang.