Delhi boruak chhia tihziaawm nan artificial rain hmang dawn

Delhi sorkar chuan khawpui chhunga boruak chhe lutuk tihziaawmna atan ruah siam chawp, artificial rain surtir a tum.

Environment minister, Gopal Rai chuan IIT Kanpur-a mithiamte nen inrawn khawmna an neih hnuah an ruahmanna siamte kalpui thei tura Supreme Court-a dilna an thlen tur thu a sawi a, SC hian phalna a pe a nih chuan November 20 leh 21-ah artificial rain hi surtir an tum tih a sawi a ni.

Delhi sorkar hian sorkar laipui remtihna pawh SC kaltlang hian a dil nghal a ni. Ruah siam chawp surtir hi a hmain ram chhung hmun dangah pawh tih a lo ni tawh a, Maharashtra-ah surtir a lo ni tawh a ni.

Gopal Rai hian lirthei intlan chhawk chungchangah pawh hman nghal rum rum tur a nih loh thu leh, a sawt ngei ang em tih leh, a sawt dan turte zir chianna nei phawt a, SC-in phalna a pe bawk a nih chuan an kalpui chauh tur thu a sawi bawk.

Lt. Governor VK Saxena pawhin,"CII leh IIT Kanpur aṭangin mi thiamte lo kalin ruah siam chawp surtir a nih theih dan leh, boruak bawlhhlawh tihziaawm nan a hman tlak ngei ang em tihte kan sawi ho a, ruahmanna leh rawtna mumal tak siama lo theh lut turin ka hrilh a ni," tiin X-ah a tarlang. IIT Kanpur-a National Clean Air Programme, steering and monitoring committee member, Prof. Sachchida Nand Tripathi chuan,"Ruah siam chawp surtir tura hmanraw ngai zawng zawng kan nei vek. Thlawhtheihna kan nei a, chhuma hnawhna tur hmanrua bakah ruah tur pawh keimahni siam ngei kan nei. Chhum awmdan dinhmun pawh uluk takin kan vil reng bawk a ni," a ti.

Delhi-a boruak bawlhhlawh hian ziaawm lam a la pan thei lo a, Air Quality Index (AQI) tehnaah chawhrualin 426 a kai reng a, hei hi boruak chhe ber anga ngaih a ni. Boruak chhia avang hian Delhi sorkar pawhin hun eng emaw chen atan zirna in pawl 12 chin thleng chu a khar lailawk tawh bawk.