India leh US 2+2 dialogue ṭum ngana nei

US secretary of state, Anthony Blinken leh US defence secretary, Lloyd Austin te chuan India rawn tlawhin, nimin khan external affairs minister, S. Jaishankar leh defence minister, Rajnath Singh te nen India-US 2+2 ministerial dialogue an nei. Meeting-ah hian khawvel huapa ram pahnihte inzawmna tinghet zual tura ralthuam siamna lama thawh dunna chungchang leh, Indo-Pacific-a hmalak dun dan te, mineral pawimawh leh technology pawimawh bika inbiakna tam zawk neih chungchang te an sawi.

Jaishankar chuan 2+2 dialogue-a an thil sawite chu prime minister Narendra Modi hmathlir leh US president Joe Biden te'n inzawmna ṭha zawk nei a, khawvel tana hnathawh an tumna te tihhlawhtlinna tur a nih thu sawiin,"Kan thawh dunna awm sa piah lamah technology thar chungchang te, mineral pawimawh bik leh khawvel pawn lama zirna leh hnathawhna chungchangte thui tak kan sawi ho a ni," tiin a tarlang.

Anthony Blinken pawhin meeting ṭan a nih hma hian,"Ram pahnihte hian langtlang leh inpawh taka Indo-Pacific himna leh ṭhanna tura inzawmna tihngheh zel kan duh tih kan tilang a, hei hi Quad kaltlanga kan thawhhona rah ṭha a ni. Tunah hian khawvel huapa remna leh muanna a awm theihna atana thawh te, zalenna thupui vawng leh, dan hmanga mahni ram venhimna kawngah te thahwho chhunzawm zel tumin hma kan la mek a ni," tiin a sawi ve bawk.