Governor chungchang SC-a thlen turin nawr

West Bengal-a academician intel khawm leh Vice Chancellor hlui pawh a telna, The Educationist Forum chuan thuchhuah siamin, West Bengal sorkar chu Governor-in assembly-a pass tawh bill a la kawl tante avanga Supreme Court-a zualko turin an ngen.

"West Bengal sorkar hi Governor-in bill a kawl tante avanga Supreme Court-a zualko turin kan ngen a ni. Punjab leh state dangte anga Governor bill kawl tan avanga zualko zingah tel ve se kan duh," tiin an tarlang.

Governor-in bill a kawl tan zingah hian state university-a Vice Chancellor thlangtu committee-te inkaihhruaina dan siamna bill pawh a tel a ni. The Educationist Forum chuan Chancellor/Governor-in hma lak muan avang hian West Bengal-a university 31-a search and selection committee-te hnathawh a ṭhuanawp phah niin an sawi. Forum chuan Chancellor chu West Bengal sorkar nen inbiakna nei a, thla ruk liam ta chhunga Bengal-a university-te chungchanga dan pela chetna awmte sut leh vek turin an ngen. West Bengal-ah hian Governor CV Ananda Bose chuan state sorkar rawn loin Vice Chancellor lailawk tur a lo ruat a ni.

West Bengal-a Vice Chancellor lailawk ruat a nih avang hian sorkar leh Governor lam hi an inbei nasa hle a, WB chief minister Mamata Banerjee chuan Governor-in Vice Chancellor lailawk a ruat leh a nih chuan kawng dan a tum thu a sawi tawh bawk. North Bengal University Vice Chancellor hlui, Prof. Omprakash Mishra chuan,"State inkaihhruaina leh rorelna danah High Court emaw Supreme Court emaw hian university enkawl dan chungchang engmah a tarlang lo. Eng ang dan hmangin nge Chancellor hian thuneitute rorel thu chhuak hi a dodal a, a zawm loh? Chancellor hian he zawhna hi a la chhang lo a ni," tiin, Governor chu state sorkar thu zawm tura an ngen thu a sawi.