Pakistan sorkarin India mi sangha mantu 80 chhuah

Pakistan sorkar chuan India mi sangha mana eizawng a man mi 80 te chu jail aṭanga a chhuah zalen hnuin Attari-Wagah ramria Border Security Force (BSF) te kutah an hlan niin official te chuan an sawi. Pakistan hian heng sangha mantu 80-te hi Karachi-a Malir tan inah a dah a ni.

Punjab police protocol officer, Arun Mahal chuan Pakistan-in a chhuah zalen tak sangha mantute chuan an vaiin Attari-Wagah ramriah motor hmanga India ram an lo luh vek tawh thu a sawi. Heng mite hi Pakistan khawpui, Islamabad-a Indian High Commissioner-in 'Emergency Travel Certificate' a pe a ni. India an rawn luh hnuah Attari-Wagah ramria Joint Check post-a India doctor duty te chuan medical exam an lo neihsak bawk.

Sangha mantute hi kum thum liam ta khan Arabian sea-a an sangha man lai chu Pakistan tuipuiah lut palhin, Pakistan hian a hreng zui ta a ni. India leh Pakistan hian sangha mantu leh an lawngte hi an in mansak fo a, hei hi Arabian sea-a ram pahnihte tuipui chin sawi fel loh vang a nih bakah, sangha manna lawng tam tak hian an awmna hre tura hmanrua an neih ṭhat tawk loh vang a ni bawk.